یەکسانکردنی بڕوانامەی بیانی

مامەڵەی پێشكەشكردنی یەکسانکردنی بڕوانامەکان بە شێوەی ئۆنلاین لەڕێگەى وێبسایتی (https://equalization.digital.gov.krd) دەبێت.

پێویستە پێشکەشکار بەر لە دەستپێكردنی خوێندن، فۆرمی نێردراوانی بەشێوەی ئۆنلاین پڕکردبێتەوە و کۆدی وەرگرتبێت لەم لینکە(https://scholarship.digital.gov.krd) ) ئەمەش وەک یەکێک لە مەرجەکانى یەکسانکردنى بڕوانامەکەى هەژماردەکرێت.

بۆ سەرجەم بڕوانامەكانى خوێندنى باڵا (دیپلۆمی تەکنیکی- بەکالۆریۆس – دیپلۆمی باڵا – ماستەر- دكتۆرا) پێویستە بڕوانامەكە لە زانكۆیەكدا بە دەستهێنرابێت كە لە لیستی زانكۆ باوەڕپێكراوەكانی وەزارەتی خوێندنی باڵادا هەبێت، بەپێچەوانەوە یەکسانکردنى بڕوانامەى بۆ ناکرێت، جگە لەو سکۆلەرشیپانەى کە وەزارەت قبوڵیکردووە

بۆ پێشکەشکارانی عێراقی (دەرەوەی دەسەڵاتی حکومەتی هەرێمی کوردستان)، لیستی زانکۆ باوەرپێکراوەکانی وەزارەتی خوێندنی باڵای عێراق قبوڵدەکرێت. بۆ پێشکەشکارانی دەرەوە، چاوپۆشی لە لیستى زانکۆ باوەڕپێکراوەکانى وەزارەت دەکرێت، بە مەرجێک زانکۆکەى لە لیستى (یونسکۆ) ياخود وێبسايتەکانى (شانگهاى) و (تایمس) بوونى هەبێت.

بڕوانامەی پێشكەشكراو ( دیپلۆما - جداری) و ( نمرە- ترانسكرێپت) و ( دیپلۆما سەپڵیمێنت) یاخود یەکێکیان، پێویستە لەلایەن وەزارەتی دەرەوەی وڵاتی خوێندن و باڵیۆزخانەی عیراق یاخود نوێنەرایەتی حكومەتی هەرێم لە وڵاتی خوێندن پەسەند (مۆر و ئیمزا) كرابێت، بە پێچەوانەوە مامەڵەكەى رايى ناکرێت.

هەر بڕوانامەیەک کە بە زمانى ئینگلیزى یاخود عەرەبى نەبێت پێویستە لە وڵاتى خوێندن وەربگێردرێتە سەر زمانى ئینگلیزى و کۆپیە وەرگێردراوەکەش لەلایەن باڵیۆزخانەی عێراق یاخود نوێنەرایەتی حكومەتی هەرێم لە وڵاتی خوێندن پەسەند كرابێت ( مۆر و ئیمزا كرابێت).

بۆ یەکسانکردنی هەر بڕوانامەیەک پێویستە بڕوانامەی پێش خۆی لەگەڵدابێت، وێرای ئەوەی لە چۆنێتی و ڕاستی و دروستی دەکۆڵرێتەوە، بەڵام تەنها بڕوانامەی داواکراو یەكسانكردنی بۆ دەكرێت. ئەگەر چەند بڕوانامەیەك بە دووای یەكدا لە دەرەوە بەدەستهاتبوون، تەنها بڕوانامەی داواکراو یەكسانكردنی بۆ دەكرێت. بۆ یەکسانکردنی بڕوانامەی بەکالوریوس، بڕوانامەی ئامادەیی، ياخود هەر بڕوانامەیەک کە بووەتە هۆی وەرگرتنی لە بەکالۆریۆس لە دەرەوەى عيراق، پێویستە لەلایەن وەزارەتی پەروەردەى حكومەتى هەرێمی کوردستان بەرابەرکردنی بۆ بكرێت.

هەر هاووڵاتیەکى بیانى کە لە وڵاتێکى جگە لە وڵاتى خۆى بڕوانامەى بەدەستهێنابێت، پێویستە لەلایەن وەزارەتی دەرەوەی وڵاتی خوێندن پەسەند(مۆر و ئیمزا) كرابێت.

خوێندنى ماستەر تەنها بەشێوازى (کۆرسات و نامە) دانپێدانراوە.

خوێندنى دکتۆرا بە هەردوو شێوازى (کۆرسات و توێژینەوە، یان تەنها توێژینەوە) رێگەپێدراوە، بە مەرجێك پێشکەشکار ماوەى مانەوەى پێویستی لە وڵاتى خوێندن هەبووبێت.

بڕوانامەى پەیمانگا (دوو ساڵ خوێندن دوای ئامادەیی) وەک دیپلۆمى تەکنیکى هەژماردەکرێت و یەکسانکردنی بۆ دەکرێت.

بڕوانامەى ڕاهێنان (نەندیگری ترەینينگ) لە بوارى پزيشكى دانپێدانراو نیە و يەكسانکردنی بۆ ناكرێت و ناچێتە چوارچێوەى بڕوانامەى ئەكاديميەوە.

پێویستە خوێندن بە زمانى فەرمی ئەو وڵاتە بێت کە تیایدا دەخوێندرێت، یاخود بە زمانى ئینگلیزى. پێشکەشکار پێويستە بڕوانامەى کۆرسى زمانى ئەو وڵاتەى هەبێت کە خوێندنەکەى پێتەواوکردووە و نامەکەی پێنوسیووە، جگە لە خوێندن لە وڵاتە عەرەبیەکان.

ئەو تێزی دکتۆرا و ماستەرنامەی بە زمانی ئینگلیزی یاخود عەرەبی نەنوسراون، پێویستە بەشێکی لەلایەن وەرگێری یاساییەوە وەربگێردرێتە سەر زمانی ئینگلیزی و لەلایەن فەرمانگەى دادنوسیەوە پەسەندكرابێت. وە ئەو بەشانەی وەردەگێردرێت پێویستە ئەمانە لە خۆی بگرێت:
(Abstract , Table of Content, Introduction, Summary of Each Part, and Conclusion)

بەمەبەستی ئەنجامدانی مامەڵەى یەکسانکردنی بڕوانامە بۆ کەسانی دەرەوەی هەرێمی کوردستان، پێویستە كارتی مانەوە و نیشتەجێبونیان لە هەرێم هەبێت و ماوەی بەسەرچونی كارتەكە لە (٣ ) مانگ كەمتر نەبێت. ئەم مەرجە ئەو فێرخوازانە ناگرێتەوە کە بەمەبەستی خوێندن لە زانکۆکانی کوردستان مامەڵە پێشکەشدەکەن.

بۆ یەکسانکردنی بڕوانامەی ماستەر، پێویستە کۆنمرەی بەکالۆریۆس لە (٦٥٪) کەمتر نەبێت. بۆ خوێندنی دکتۆراش نابێت کۆنمرەی ماستەر لە (٧٠٪) کەمتر بێت. بە پێچەوانەوە دان بە بروانامەکەیان نانرێت.

ماوەی مانەوەی پێویست بۆ خوێندن لە وڵاتانی دەرەوەی عێراق، پێوستە بەم شێوەیەبێت کە رێنمایی ژمارە (5)ی ساڵی 2022 ڕێنمایی یەکسانکردنی بڕوانامەکان دیاریکردووە.

پێوستە تاقیکردنەوەو سیمینارى توانستى زانستى بەپێی ئەو مەرجانەبێت کە لە ڕێنمایی ژمارە (5)ی ساڵی 2022 ڕێنمایی یەکسانکردنی بڕوانامەکان دیاریکراوە.

تەنها ئەو بڕوانامانە بە ئەكادیمی هەژمار دەكرێن كە لە یەك پسپۆڕی بەدەستهاتوون. واتە دووا بڕوانامە لەگەڵ بڕوانامەی پێش خۆی پێویستە لە هەمان پسپۆڕی بن، بە پێچەوانەوە بە بڕوانامەی پیشەیی هەژمار دەکرێت.

خوێندن و بروانامەی بەدەستهاتوو بە شیوازی ئۆنلاین لە کوردستان قبوڵکراو نیە و یەکسانکردنی بۆ ناکرێت.

ئەو پێشکەشکارانەی کە فەرمانبەرن تەنها بەمەرجی هەبوونی مۆڵەتی خوێندن بڕوانامەکەیان بۆ یەکساندەکرێت، هاوکات پێویستە لاری نەبونی وەزارەتەكەیان و فەرمانی دەستلەكارهەڵگرتن و دەستبەكاربونەوەیان پێشكەشبكەن، بەپێچەوانەوە یەکسانکردنی بڕوانامەیان بۆ ناکرێت، ماوەى نێوانى ڕێکەوتی دەرچونى فەرمانى دەستلەکارهەڵگرتن و ڕێکەوتی دەستپێکردنى خوێندن نابێت لە (٣٠) رۆژ زیاتر بووبێت.

هەر پێشكەشكارێك كە فەرمانبەر نیە، پێویستە لەکاتی پێشکەشکردنی مامەڵەى یەکسانکردنی بڕوانامە، بەڵێننامەیەک لەڕێگەی بەڕێوەبەرایەتى کاروبارى یاسایی وەزارەتی خوێندنی باڵا، یاخود فەرمانگەى دادنوسى پێشکەش بکات، تیایدا بەڵێن بدات کە فەرمانبەر نەبووە/نیە لە هیچ دامەزراوەیەكی حكومەتی هەرێمى كوردستان و عێراق. وە لەسەر بڕیارى یەکسانکردنى بڕوانامەکەى بە ئاشکرا ئاماژە بە ژمارە و ڕێکەوتی دەرچوونى بەڵێننامەکە دەدرێت.

ئەوانەى لە دواى پۆلی (٩)ی بنەڕەتی پەیمانگای (٥) ساڵەیان خوێندووە و دەیانەوێت لە دەرەوەى هەرێم درێژە بە خوێندن بدەن، ئەوا بە هەمان ڕێنمایی وەرگرتنیان لە زانکۆکانى ناوخۆدا مامەڵەیان لەگەڵدا دەکرێت.