کۆنترۆڵکردنی سەرچاوەی تیشکدەر

پێویستە داواکاریی کۆمپانیاکان لە ڕێگەی لایەنی پەیوەندیدارەوە بێت؛ نووسراوێک ئاراستەی دەستەی پاراستن و چاککردنی ژینگە دەکرێت بۆ وەرگرتنی ڕەزامەندی.

مۆڵەتی دامەزراندن یان تۆمارکردنی کۆمپانیای هاوردەکار کە لە وەزارەتی بازرگانی و پیشەسازی/ بەڕێوەبەرایەتیی گشتیی تۆمارکردنی کۆمپانیاکان دەرچووبێت.

نووسراوی فەرمیی لایەنی هاوردەکار، کە تێیدا ڕوونکرابێتەوە پێویستیان بە سەرچاوەی تیشکی هەیە؛ لەگەڵ دیاریکردنی ئەو لایەنەی بەکاری دەهێنێت، شوێنی بەکارهێنان و دەروازەی هاتنەناوەوەی.

ئەگەر هاوردەکار لایەنی حکومی بێت بۆ بەکارهێنانی ماددە تیشکدەرەکان لە پڕۆژەکاندا، پێویستە ئاگاداری دەستەی ژینگە بکەنەوە کە پێویستیان بەو سەرچاوانە هەیە و داوای هاوردەکردنی بکەن؛ وەک (وەزارەتی سامانە سروشتییەکان، وەزارەتی ئاوەدانکردنەوە، یان هەر لایەنێکی حکومی کە بەرپرسیارە لەو پڕۆژەیە)، ئەگەر سەرچاوەکە لە ڕێگەی فڕۆکەخانە و دەروازە سنوورییەکانەوە هاوردە بکرێت.

لایەنی هاوردەکار بە نووسراوی فەرمی یەکێک لە فەرمانبەرانی دەستنیشان دەکات بۆ سەردانی دەستەی ژینگە و ئیمزاکردن و بەدواداچوون بۆ تەواوکردنی ڕێکارەکانی پێدانی مۆڵەتی هاوردەکردن.

پێویستە سەرچاوە تیشکاوەییەکان و ئامێرە پێوەلکاوەکان بەڵگەنامەی دروستکردنیان هەبێت.

پێویستە ڕەزامەندیی دروستکردنی کۆگا کە لەلایەن دەستەی پاراستن و چاککردنی ژینگە پێیدرابێت؛ ئەگەر سەرچاوەکە بەشێک بوو لە ئامێرەکە و لێی جیا نەکرایەوە، پێویستە بە نووسراوێک ڕوونکردنەوە بدات و وێنەیەک لە کەتەلۆگەکەی هاوپێچ بکات.